PORT-AU-PRINCE, HAITI.- Miembronan di un gèn a hasi un atake djadumingu mardugá den e pueblo haitiano Petite-Riviere-de-L’Artibonite djadumingu mardugá. E atake a laga por lo ménos 16 morto, segun indikashon di polis lokal.
Sinembargo, e kantidat d víktimanan por sigui subi na 80 persona segun indikashon di Nashonnan Uní.
“E atake ta mustra kon grave e situashon di seguridat ta den e pueblo haitiano. E sekretario general di Nashonnan Uní a hasi un petishon pa e pueblo haitiano i tambe outoridatnan haitiano ehekutá un investigashon profundo”, asina e bosero di Nashonnan Uní, Stephane Dujarric a bisa.
Segun Bertide Horace, bosero di e organisashon Komishon di Diálogo, rekonsiliashon i Konsientisashon pa Salba Artibonito, e atake tabata obra di e gèn “Gran Grif”.
Djaluna mainta un atake mas a tuma lugá den e pueblo. Horace a bisa ku akinan 30 persona a muri i ku tin vários persona pèrdí i heridá.
Den su rueda di prensa diario, Dujarric a papia di entre 10 i 80 persona morto.
Haiti, e pais di mas pober di Amerika, ta sufri ya pa basta aña kaba di violensia di gènnan kriminal ku ta kometé asesinato, violashon, sakeo i sekuestro.
