Regularmente tin marchanan di protesta na México protestando kontra di violensia kontra di menornan di edat den e guera entre gruponan di narko.
CIUDAD DE MEXICO (AFP).- Por lo ménos 39 menor a keda asesiná i 97 ta perd’í relashoná ku e guera entre dos grupo dje kartel di Sinaloa, un dje organisashonnan narkotrafikante mas poderoso di México.
E enfrentamentu, den nortwèst dje pais, a start despues di detenshon na Merka na final di yüli di 2024 di Ismael “El Mayo” Zambada, kende a bisa di a keda sekuestrá i hibá Merka den un avion privá. Esun ku a hasi esei tabata yu di su sosio bieu, Joaquin “El Chapo” Guzman, tambe prezu den un prizòn na Merka.
“Trintinuebe menor di edat a pèrdè nan bida den e konflikto armá”, segun Oscar Loza, presidente (ombudsman) di Komishon Estatal di derechinan Humano di Sinaloa.
97 otro menor a desaparesé meimei dje disputa, segun e funshonario refiriendo na datonan di ministerio públiko.
E insidente mas resien a tuma lugá djaluna último, ora ku dos mucha muhé di 7 i 12 aña a muri despues di a keda atrapá den un enfrentamentu entre miembronan dje Guardia Nacional i Ministerio Públiko ku un grupo armá.
E tiroteo a tuma lugá den e munisipio di Badiraguato, kuna di Chapo Guzman i otro kaponan dje kartel di Sinaloa. Un otro mucha di 12 aña tambe a keda heridá, huntu ku su mayornan.
E guera entre herederonan di Chapo i e grupo di Mayo a laga mas ku 1.200 morto i 1.400 hende ku a disparsé, ademas di un impakto profundo riba ekonomia i bida normal den Culiacán i otro pueblonan diSinaloa.
Den e siudatnan ei negoshinan mester a sera nan porta debí na e violensia. Coparmex, un organisashon di inisiativa privá, a kalkulá den yanüari pèrdidárnan na ason di 18.000 mion peso (920 mion dòler).
