Famianan di prezunan polítiko na Venezuela ta reuní di dia i anochi dilanti e prizòn ”El Helicoide” den Caracas, sperando liberashon di esnan detené pa motibu di a protestá kontra di Nicolás Maduro.
CARACAS (AFP).- Un kantidat di sigur 80 prezu polítiko mas ayera por a sali for di prizòn na Venezuela, kaminda ku un proseso di liberashon di detenidonan ta tumando lugá bou di preshon di Washington despues di kaida di Nicolás Maduro, segun e organisashon Foro Penal. E gobièrnu di Delcy Rodriguez, kende a asumí poder despues dje kaptura di Maduro den un operashon militar norteamerikano dia 3 di yanüari, a primintí un”kantidat importante” di liberashon.
Oposishon i organisashon di defensornan di derechinan humano, no opstante ta denunsiá e lentitut den e proseso. Famianan ta sinta warda pafó di prizònnan i hopi ta pasa anochinan kompleto ku e speransa di mira nan sernan kerí sali for di prizòn.
Djasabra e direktor di Foro Penal, Alfredo Romero, a skibi riba e ret sosial X ku “por lo ménos 80 prezu polítiko awe (djasabra) a sali for di prizòn rònt e pais. “Probablemente mas lo sali”.
Gobièrnu venezolano a referí na kantidat di 626 prezu ku nan laga bai den desèmber, sifra ku djabièrnè último e komisario pa Derechinan Humano di Nashonnan Uni a pidi pa keda verifiká.
E protestanan spontanio kontra e reelekshon kuestioná di Maduro den 2024 a kaba den represhon i aresto di mas ku 2.000 persona den 48 ora. Ademas, ta rigi un estado di konmoshon ku ta kastigá ku prizòn esnan ku apoyá e atake norteamerikano.
