NEW DELHI, INDIA, AP.- Awaseru fuerte a terminá ku dos aña di sekura na India. Pero esaki a pone ku riunan a krese na nivelnan peligroso. Esaki a obligá evakuashon di sentenar di míles di persona di nan kasnan den parti nort i ost di e pais. asina un funshonario a indiká djárason.
Por lo ménos 175 persona a fayesé despues di a hoga, wòrdu elektrokutá òf di heridanan derivá pa derumbe di kasnan durante e temporadanan di áwaseru, mayormente den estado di Bengala Oksidental, Assam, Uttar Pradesh i Bihar. Asina Rakesh Ranjan a splika, kende ta un funshonario di Forsa Nashonal di Respuesta di Desaster. E rayonan a mata 57 persona den estado di Bihar.
E inundashonnan ta habitual den mayoria zona di India durante temporada di áwaseru, ku ta e temporada di yüni i sèptèmber.
Den e siudat sagrado hindú di Varanasi, na Uttar Pradesh, e inundashon a obligá paro di kremashon den un zona.
E hindúnan devoto a trese nan famianan morto pa Varanasi ku e kreensia pa nan wòrdu kremá pa asina nan alma wòrdu liberá di e siklo di morto i reenkarnashon.
