SAN JUAN, AP.- E sintimentu di personanan ku ta kansa di e negligensia di Washington i di e gobièrnu portorikeño a propagá den Puerto Rico kompleto djárason.
E isla ta pega den un krísis i ta bringando pa sali for di esaki pa motibu di un debe grandi. E isla kier risibí fondonan di emergensia pa rekuperá di orkan Maria, kual a laga míles di morto na sèptèmber 2017. E ret eléktriko a kolèps durante vários luna i aparte di esaki ansiano i personanan malu no tabata risibí sufisiente atenshon. Diferente skol a sera i un gran variedat di servisio sosial i penshun a wòrdu anulá òf ta kore rísiko di wòrdu kanselá.
“Puerto Rico a sufri hopi i nos no por mas”, asina kantante Ricky Martin a bisa den un video publiká riba internèt. “Ta basta awor”.
E kantante a bisa ku “e disgustu ta asina fuerte ku ta promé biaha ku mi ta mira Puerto Rico lanta i manifestá komo unu”.
E skandal a surgi despues ku e eks sekretaria di edukashon di gobernador Rosello i sinku persona mas a wòrdu arestá i akusá ku desviashon di fondonan federal pa kontratistanan no kualifiká, pero polítikamente konektá.
