ORANJESTAD.- Polis di Aruba ta informá ku den kuadro di un investigashon penal ku ta kanando, Unidat di Trafikashon i Kontrabanda di Hende (UMM) a tene riba djamars 15 di Sèptèmber último un entrada hudisial na Maxime Night Club, situá na Kruisweg den Oranjestad. UMM a risibí asistensia di UGC (Unidat di Krímen Organisá), BFO (Bureau Financieel Onderzoek) i polis tékniko. A konfiská atministrashon, kargadónan di informashon i un suma di plaka. No a hasi ningun detenshon i esei tabata pa motibu ku e tim investigadó ainda ta analisando tur informashon kolekta.
Durante e entrada hudisial a topa ku kuater (4) hende muhé posiblemente hasiendo trabou di prostitushon i un trahadó femenino tras di bar, ku no tabata tin e pèrmitnan válido ku ta rekerí pa por traha. A wòrdu transportá e personanan aki i despues e tim investigadó a skucha nan.
No a interogá e muhénan komo sospechoso ni tampoko no a detené nan. E investigashon ta dirigí riba, entre otro, posibel hechonan kastigabel relashoná ku kontrabanda di hende i labor ilegal.
E investigashon ta kanando ketu bai. Na e momento aki no por duna mas detaye. Polis ta sigui komprometí den e lucha kontra trafikashon di hende i kontrabanda di hende i ta hasi un yamada na víktimanan òf testigunan pa tuma kontakto via tiplijn 11141.
