Posibel konsekuensianan pa Karibe komo resultado di akshonnan di Estadonan Uní

WILLEMSTAD.- Marla Dukharan, ekonomista i konsehero prinsipal di Karibe, konosí pa su análisis profundo i evaluashonnan basá riba dato, a publiká resientemente un análisis interesante i posibel konsekuensianan pa Karibe komo resultado di e askhonnan di Estadonan Uní. Lo siguiente ta un ekstrakto di su rapòrt/informe ekonómiko mensual di febrüari 2025. Asina Bonnie Benesh, di Think 2DO Institute, a duna di konosé awe den un komunikado di prensa.
“Den un mundu kaminda institushonnan mundial ta deteriorando segun ku nos ta presensiá e desintegrashon konsistente di e òrdu internashonal despues di temp’i guera , kooperashon mundial ta na su punto mas abou den dékadanan, i ta antisipá ku e lo baha aun mas ainda pa motibu ku agèndanan nashonal òf asta agènda i interesnan individual ta prevalesé; partikularmente despues di pandemia. Lidernan tradishonal i institushonnan mundial a bin ta faya pa resolvé disputanan òf evitá desasternan, demostrando ku un reforma di institushonnan mundial i di e dinámika di poder, ta nesesario.
Mas ku 70 pais a tene elekshon aña pasá i mas ku 1.7 bion hende a vota; posiblemente e kantidat di mas haltu ku nunka, ku un promedio mundial di partisipashon di votadó di 61%. E aña aki lo ta e aña di elekshon di mas grandi pa Karibe, pasobra Jamaica, Trinidad & Tobago, Surnam, Guyana, St. Vincent & the Grenadines, Anguilla, Belize, Bermuda, Kòrsou, e Islanan Turks & Caicos, i e Islanan Cayman tur ta tene elekshonnan general e aña aki.
Kosto di bida lo aparesé hopi den kampañanan di elekshon, i lo impulsá nivelnan mas haltu di pobresa, difikultat, i mas migrashon pa eksterior, posiblemente oumentando / empeorando kambionan demográfiko global grandi. E kambio den dominio di poblashon den e parti sùit mundial ya a trese kambio signifikante pa e dinámika di poder mundial, inkluyendo e fortalesamentu di e institushon BRICS, ku awor ta inkluí Brazil, Rusia, India, China, Suráfrika, Egipto, Etiopia, Iran i Emiratonan Árabe Uní. Na nan kumbre di òktober 2024 na Rusia, miembronan di BRICS a introdusí un sistema di pago i areglo interbankario transfronteriso yamá “BRICS Pay” komo un alternativa na e sistema SWIFT, eroshonando mas ainda e dominio di dòler Merikano, ku tabata konta pa alrededor di 80% di e reservanan mundial mei siglo pasá, pero awor ta alrededor di 60%.
Diestres nashon a wòrdu agregá komo paisnan partner di BRICS: Algeria, Belarus, Bolivia, Cuba, Indonesia, Kazakhstan, Malaysia, Nigeria, Thailand, Turkia, Uganda, Uzbekistan i Vietnam. India lo sigui ta e pais mas poblá básikamente pa semper. Mas o ménos 80% di e poblashon di India ta identifiká komo hindú, pero e religion dominante di e otro paisnan mas poblá – Pakistan, Indonesia, Bangladesh, 50% di Nigeria, 33% di Tanzania, i 31% di Etiopia, ta islam. Ya kaba e region di Karibe a konfrontá e inflashon di mas haltu globalmente pa e último 10 añanan, i e implikashonnan sosial, ekonómiko i demográfiko pa ku e inflashon aki no ta positivo. “