Kandidato presidensial peruano Roberto Sanchez, di e partido “Juntos por el Perú”.
LIMA, Perú (AFP).- E hefe di entidat elektoral ku a organisá e preelekshon general na Peru, Piero Corvetto, ayera a renunsiá dje funshon algun ora despues di a bai serka fiskal relashoná ku un investigashon riba e elekshon. “Ta e deseo pa mi renunsiá i kontribuí pa generá e konfiansa nesesario pa yega na elekshon”, segun e funshonario a bisa ayera. Corvetto tabata na mando di Ofisina Nashonal di Prosesonan Elektoral for di 31 di ougùstùs di 2020.
“Mi ta haña ku ta bon pa mi renunsiá e responsabilidat i esaki pa habri kaminda pa organisá i ehekutá e di dos buèlta dje elekshon presidensial ku un mayor konfiansa serka di siudadania”, segun el a duna di konosé. El a kalifiká komo “problemanan tékniko operashonal” e iregularidatnan ku a keda registrá den e preelekshon 21 di aprel.
E problemanan ku a presentá a provoká oranan di tardansa pa apertura di urnanan elektoral den e kapital peruano i ku finalmente 50.000 persona no por a vota, loke a obligá pa amplia ku 24 ora e posibilidat pa vota. E opservador di Union Europeo a referí na “fayonan grave”, pero a agregá di no a haña ”ningun prueba ophetivo” di froude, manera a keda bisá di parti dje kandidato ultrakonservador Rafael Lopez Aliaga.
E Hurado Nashonal di Elekshon (JNE),e máksimo outoridat elektoral dje pais, ta kalkulá ku e resultadonan final lo no bira konosí promé ku 15 di mei debí na tardansa den e sistema di kòmpiuter.
Hecho ta ku peruanonan ainda no sa ken lo disputa e elekshon di 7 di yüni kontra dje derechista Keiko Fujimori, ku ta e úniko boleto sigur.
