Preis kombustibel, awa i elektrisidat ta keda meskos

WILLEMSTAD.- E tarifa regulá di gasolin, disel i LPG na Kòrsou den luna di yüli ta keda meskos i lo drenta na vigor for di djamars 30 di yüni 2020. E tarifa aktual di awa i di elektrisidat tambe ta keda mantené den yüli i lo drenta na vigor for di djárason 1 di yüli 2020. BT&P ta supervisá e desaroyo di preis di produktonan petrolero i di utilidat.

E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan 1. Preis di kompra, 2. Impuesto di importashon LSD, 3. Garantia di suministro di kombustibel, 4. Garantia di suministro di kombustibel (2) 5. Márgen pa Curoil, 6. Impuesto di konsumo (Akseins), 7. Sùrplùs/Défisit (Recovery), 8. Supsidio krusá, 9. O.B. di 6% pa benta por mayor, 10. Márgen pa agente, 11. Garantia distribushon komèrsio por menor i 12. O.B. di 6% pa benta por detal. Pa sierto komponente e tarifa sero ta konta, sea temporalmente òf nò. E tarifa pa benta por mayor ta inkluí e promé nuebe komponentenan miéntras ku e tarifa pa benta por detal (na usuario final) ta inkluí tur komponente.

Ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues: e preisnan di kompra ku ta stipulá pa yüli 2020, ta basá riba Curoil su fakturanan di kompra di mei 2020. Den kaso ku kompra no a tuma lugá den un sierto luna pa motibu di un reserva adekuá, ta sali for di e fakturanan di kompra di mas resien. E preisnan di kompra akí ta wòrdu revisá dor di notashon di preis internashonal. Ta tene kuenta tambe ku otro eventual gastunan, relashoná ku e kompra, por ehèmpel gastunan di inspekshon. Dor di e lapso di dos (2) luna den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Sùrplùs/Défisit’.

E tarifanan di e produktonan Mogas, LSD i LPG den luna di yüli ta keda idéntiko, pues sin kambio.

Kálkulo tarifa awa i koriente

BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di yüli 2020.

Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di mei 2020.

BT&P ta determiná e tarifa básiko pa tantu awa komo elektrisidat un biaha pa aña.

E tarifanan pa awa di bebe i elektrisidat ta keda mantené na e nivel di tarifa aktual. Esaki tambe ta den liña ku mantenementu di e tarifanan for di mei 2020.

SHARE

LEAVE A REPLY