WILLEMSTAD.- Banda di e atvertensia kódigo hel pa laman brutu nos tin tambe e dianan aki e atvertensia kódigo hel pa stòf eksesivo di Sahara. Nos ta konos’é komo santu di Sahara.
Segun servisio Meteorológiko, ekstenshon di un área di preshon haltu riba Osean Atlántiko Nort ta motibu pa kondishonnan ku ménos posibilidat pa áwaseru riba nos isla durante próksimo 24 ora. Tambe, e stòf di Sahara moderá te de bes en kuando tenso lo move den e área, suprimiendo desaroyo konvektivo i kousa visibilidat redusí ku un bahada den kalidat di aire.
Komo resultado, un mensahe di prekoushon (Kódigo Hel) pa stòf eksesivo di Sahara ta na vigor. Stòf di Sahara ta sigui mantené e visibilidat redusí i degradá kalidat di airu.
E stòf di Sahara aki por kousa problema di salú pa esnan partikularmente ku ta sufri di asma, alergia i malesa di pulmon. I p’esei ta importante pa tuma pasonan e dianan aki pa evitá e stòf di Sahara aki mas tantu posibel.
Mas aleu, un diferensia di preshon kresiente lo generá bientu fuerte te posibel duru den ráfaga prinsipalmente durante awe, kousando laman basta brutu. Pa e motibu aki tambe, un mensahe di prekoushon (Kódigo Hel) pa laman brutu ta na vigor entrante 8or di ayera nochi.
Kondishon di laman: Moderá ku altura di olanan entre 1 i 2 meter (3 i 7 pia). E olanan di mas haltu ta situá riba laman habrí na nort i ost di e isla. Usuarionan di boto chikí ta wòrdu konsehá pa no nabegá leu for di kosta, pa motibu di e bista redusí pa presensia di stòf di Sahara. Relashoná ku laman brutu (Kódigo Hel) ta konsehá landadónan i nabegantenan pa ehersé koutela.
Segun Servisio Meteorológiko ayera promé di yüni, Temporada di Orkan 2026 pa Region Atlántiko ta kuminsá ofisialmente. Manera ta kustumber, Servisio Meteorológiko Kòrsou lo vigilá tur disturbio tropikal ku por forma un menasa pa nos isla. Si ta nesesario, lo emití atvertensia na públiko en general i outoridatnan di Kòrsou. E nòmbernan ku a ser reservá pa e tormentanan tropikal i orkannan di e aña aki ta: Arthur, Bertha, Cristobal, Dolly, Edouard, Fay, Gonzalo, Hanna, Isaias, Josephine, Kyle, Leah, Marco, Nana, Omar, Paulette, René, Sally, Teddy, Vicky i Wilfred.
