Premier: No tin niun desishon pa kòrta gastu den enseñansa

Ta bai ehekutá TUR kondishon ku Ulanda a pone

WILLEMSTAD.- Minister presidènt i alabes minister di enseñansa Eugene Rhuggenaath a duna di konosé awe ku gobièrnu di Kòrsou no a tuma niun desishon pa kòrta gastu den enseñansa ku ta afektá skolnan ni dosentenan. E mandatario a bisa ku e ta konsiente ku e informashon ku a Sali anteriormente a kousa hopi konsternashon den komunidat i sektor di enseñansa.

Rhuggenaath a sigui bisa ku ta tratando pa logra manehá e presupuesto di 2021 pues no pa e aña aki. Echo ta ku gobièrnu tin su desafionan i loke ta hopi importante pa komprondé ku gobièrnu no ta risibiendo e entradanan ku a presupuestá. Esei ta enserá ku no por kumpli ku tareanan inkluso di enseñansa na nos muchanan i p’esei mester hasi ekonomisashon, pero esaki ta sin ku e ta mishi ku kalidat di enseñansa.

Pa loke ta trata e sosten finansiero for di Ulanda, minister presidènt a duna di konosé ku gobièrnu ta pendiente di e di 3 tranche di yudansa finansiero. Dia 3 yüli lo diskutí e petishon di Kòrsou den reunion di Konseho di Minister di Reino (RMR). E enfoke ta pa ehekutá, den kuadro di lei, tur kondishonnan ku Ulanda a pone. No ta kla ainda kiko por spera 3 di yüli próksimo. Mas detaye den edishon di EXTRA.

SHARE

LEAVE A REPLY