Refineria por hasi ‘blending’ pero refinashon si no mas
WILLEMSTAD.- Parlamento di Kòrsou a reanudá un reunion ku a kuminsá na febrüari 2026, ku a trata e último desaroyonan rondó di e kompania Oryx/Vigor ku tin un kontrakt pa operá Refineria Isla i Bullenbaai. Kontestando preguntanan riba e tópiko aki premier Gilmar Pisas a duna di konosé ku niun empleado di CRU, ku ta un kompania supsidiario di 2Bays, no a bai kas. Tur a keda na trabou. Loke si a sosodé ta ku 2Bays a terminá e kontrakt ku Oryx/Vigor debí na inkumplimentu ku pagonan na 2Bays.
Pisas a splika ku e no por bai den muchu detaye riba e kontrakt entre 2Bays i Vigor debí ku abogadonan ta atendiendo e finalisashon di e akuerdo loke ta enserá ku ainda 2Bays ta mara na akuerdonan di konfidensialidat.
Un punto ku tambe a bini dilanti ta e barku Regina ku a drenta haf i sali sin problema. Pisas a duna di konosé ku e barku Regina a drenta haf na febrüari último, pero na e momentu ei e barku no tabata riba niun lista di sanshon. Ta despues, di parti di Hulanda a informá outoridatnan lokal ku tin un lista di barkunan ku bandera dudoso. Ta ei a bin sali afó ku Regina ta nabegá bou di bandera dudoso. E momentu ei si outoridatnan lokal por a aktua kontra di e barku.
Riba e pregunta si e refineria na Kòrsou lo por hasi trabou di refinashon premier a bisa ku refinashon manera Kòrsou a konosé esei pa hopi aña lo no por mas spesialmente debí na lei i reglanan nobo pa loke ta trata medio ambiente i kalidat di airu. Loke si ta posibel pa e refineria sigui hasi ta trabounan di blending. Premier Pisas a enfatisá ku e kontrakt ku Orxy/Vigor ta for di mesa.
