Prens Harry huntu ku su kasá Meghan. E prens a pèrdè e kaso ku el a entamá pa risibí protekshon polisial na momentu ku e ta den Reino Uní.
LONDRES, Gran Bretaña (AFP).- Prens Harry, distansiá for di famia real, ayera a deklará di ta deseá pa rekonsiliá ku su famia, i a trese dilanti di ta “devastá” despues di a pèrdè un rekurso hudisial riba su protekshon polisial. Segun su persona, e veredikto ta strob’é di regresá Reino Uni ku su kasá i yunan.
“Algun miembro di mi famia nunka lo pordoná mi pa a skirbi un buki, pero ami tin hopi gana pa rekonsiliá ku nan”, segun el a deklará na BBC, refiriendo na su outobiografia publiká dos aña pasá.
E prens, di 40 aña, a trese dilanti ku e no tin kontakto ku su tata, Prens Charles III, ku for di 2024 tin kanser.
Segun William ku e orígen dje distansia ta sinta den e akshonnan legal ku el a kuminsá kontra un desishon di gobièrnu relashoná ku e redukshon di medidanan di seguridat pa su persona i su famia, ku for di 2020 ta biba na California, ora ku nan biaha pa Reino Uni. E kaso ku el a entamá a keda rechasá ayera pa Tribunal di Apelashon di Londres.
“Mi no sa kuantu tempu di bida mas a keda pa mi tata, pero lo ta bon pa nos rekonsiliá. “No tin un motibu pa sigui bringa. Bida ta algu bunita”, segun Harry den un entrevista for di California.
Despues di a bandoná e pais den 2020, e yu menor di Rei Charles III i su kasá Meghan, a pèrdè e protekshon sistemátiko ku tin pa miembronan aktivo di famia real, finansiá pa pagadónan britániko di impuesto.
Aktualmente, Ministerio di Interior ta evaluá kaso pa kaso riba e petishon di protekshon dje prens ora ku e bishitá Reino Uní.
Pa hustisia britániko, e protekshon polisial sistemátiko den Reino Uní no por sigui pa motibu ku e prens ya no ta un miembro aktivo di famia real.
Den e proseso hudisial ku el a pèrdè ayera, e hues Geofrey Vos, di Tribunal di Apelashon, a bisa dunando sentensia ku e desishon pa redusí e medidanan di seguridat ta “komprendibel” ya ku “el a bandoná su funshonnan real i Reino Uni pa biba prinsipalmente p’afo di pais”.
