LONDON, REINO UNI, AFP.- Reino Uní ta di Luto. Prens Philip, kasá di reina Elizabeth II a muri djabièrnè faltando dos luna pa e kumpli 100 aña.

“E prens a fayesé awe mainta den kastel di Windsor”, segun indikashon di Palasio di Buckingham.

Promé minister Boris Jonson a elogiá “bida i trabou ekstraordinario” di e duke di Edimburgo. El a enkabesá un homenahe di e nashon kompleto i a manda mensahe di pésame pa e reina.

Partidonan polítiko a anunsiá ku lo suspendé nan kampaña di elekshon regional i munisipal di 6 di mei i e gobièrnu lo kanselá tur evento ofisial.

E bèl di Westminister Abbey a zona kada minüt, 99 biaha na honor di e defuntu kuminsando 6 or di atardi.

Ainda no a anunsiá fecha di entiero i tambe mester tene kuenta ku e medidanan di COVID-19.

Palasio di Buckingham lo anunsiá e detayenan pronto, pero e sosiedat di College Arms, enkargá ku protokòl a bisa ku e entiero lo ta privá. Segun deseonan di e duke, e seremonia ta tuma lugá den kapel di Saint George di Windsor i debí na COVID-19 lo pidi e públiko pa keda kas.

A hospitalisá e prens riba 16 di febrüari komo medida di prekoushon pa motibu ku e no tabata sinti su mes bon. Palasio real a informá ku ta trata di un infekshon i no COVID.

LAGA UN KOMENTARIO

Please enter your comment!
Please enter your name here