Gobièrnu ta kumpli manera palabrá ku ta paga salario dia 25 di luna
WILLEMSTAD.-Relashoná ku e situashon di preokupashon ku a surgi serka ámtenarnan pa loke ta trata kobransa di nan salario, EXTRA a kaba di haña informashon di minister Armin Konket ku a splika ku despues di deliberashon ku Girobank e por informá ku segun kalkulo di Girobank, tur ámtenar ku ta kobra via Girobank lo risibí nan pago pa mas tardi 1’or awe mèrdia. Ya kaba tin ámtenar ku a kobra nan salario.
Minister Konket ta kontentu i ta spera ku ta resultá loke a palabra ku Girobank i si ta asina por bisa ku tur ámtenar a risibí nan salario riba e dia ku gobièrnu a palabra ku ta paga, esta 25 di kada luna.
Pa loke ta trata e parti ku tin ámtenar ku a kobra 58 florin, òf 300 florin so e minister a bisa ku nan a chek kaba i ta asina ku gobièrnu a hasi transferensia di e montante korekto ku kada empleado mester risibí. Ta bon pa empleadonan ku nota diskrepansia chek ku nan banko.
Preokupashon tin ámtenar a kobra 58 florin so
Esnan ku ta kobra na Giro tin problema
WILLEMSTAD.- E último informashon ku EXTRA a kaba di risibí di minister Konket ta indiká ku aparentemente ta ámtenarnan ku tin kuenta na Giro no a risibí pago. E minister no tabata na altura di e problema, pero el a indiká ku mesora e ta bai chek kiko a pasa. E ta laga chek na Giro kiko lo por ta e problema. E mandatario ta bisa ku di tur manera no ta asina ku ta serka gobièrnu tin algu ku a bai robes.
WILLEMSTAD.- Definitivamente mester tin un fayo un kaminda! Di e forma ei e dirigente sindikal Amado Vilchez a reakshoná serka EXTRA relashoná ku e preokupashon ku a lanta serka sierto empleadonan públiko despues ku nan a nota ku nan salario no a pasa, òf no a pasa kompletu. Vilchez a informá ku tin trahadó a nota ku ta apénas 58 florin nan a risibí, miéntras ku tin otronan ku a nota ku ta apénas 300 florin i otronan a kobra mitar salario. Tin algu ku no ta bon i e no ta konta pa Kuerpo Polisial so. Sindikato SAP tin miembro den otro ministerionan tambe i ta tumando nota ku ta hopi ministerio tin mesun problema.
Den kombersashon ku sr. Vilchez el a duna di konosé ku ta for di ayera nan a kuminsá haña diferente reakshon di hendenan ku ta bisa ku nan no a haña nan salario. Ora ta un hende so hasi e remarke no ta un problema, pero despues e ta bira dos, tres i diferente hende mas ta keda indiká mesun situashon i e ora ei si a bai chek ta kiko ta pasando. Tambe a tuma nota ku ta empleadonan públiko den diferente ministerio ta konfrontá e mesun problema.
Ta den e kuadro ei ku SAP a emití un informe den kua ta hasi apelashon na tur empleado públiko ku nota diskrepansia ku nan salario pa nan mèldu esei awe mainta na ofisina di SAP. E dirigentenan sindikal ta bai inventarisá e situashon i pa buska solushon.
Mishon di SAP ta pa remediá e fayo prome ku trahadónan bai hasi uso di nan karchi di banko pa kumpli ku nan obligashonnan. Ta bisto ku gobièrnu kisas no sa mes di e situashon aki, asina Vilchez a finalisá.
EXTRA a sigui buska mas leu i a komprondé ku na e departamentu ku ta atendé atministrashon di salario di empleadonan públiko lo tin un situashon ferfelu despues ku gobièrnu lo a kita akseso di dos funshonario haltu.
EXTRA no a logra haña un komentario ainda di minister Armin Konket di e ministerio Maneho di Gobernashon, Planifikashon i Servisio públiko. Nos ta keda pendiente di kontakto ku e minister.
