Entre otro lo tin un sena spesial pa invitadonan
WILLEMSTAD.- Miéntras ku ta ful den selebrashon ainda di siman di kultura, gobièrnu di Kòrsou ta planiando e próksimo selebrashon. 10-10-10, òf manera gobièrnu ta yama esaki: Dia di pais Kòrsou. For di siman pasá e invitashonnan a sali pa un sena formal den kuadro di konmemorashon di “Dia di Pais Kòrsou 10-10-10.”
For di seno di gabinete di Promé Minister Gilmar ‘Pik’ Pisas, e invitashonnan personal a sali pa e gran sena aki ku lo tuma lugá na Curaçao Marriott Beach Resort, 1 dia promé ku 10 di òktober, esta dia 9 di òktober. Riba e invitashon digital tin un qr-code ku kada invitado mester skèn pa asina nan por registrá digital i konfirmá nan presensia na e sena.
Na mes momentu e invitado mester yena tambe ta ki menú e ke pa e sena. Despues di kompletá su registrashon digital e sistema ta generá un qr-code nobo. E qr-code nobo aki ta personal. E invitado mester warda esaki pasobra e ta su prueba pa e por drenta e anochi di e sena.
Sin e qr-code personal akí e invitado no por drenta. No ta konosí ainda kua otro selebrashon tin planiá relashoná ku 10-10-10. Manera a bira kustumber, ta organisá fiesta(nan) públiko sea ku ta pa kualke dia di fiesta ofisial, deporte, etc. Djadumingu 27 di sèptèmber a inisiá ku e selebrashon di siman di kultura na Sabaneta.
Resientemente sekretario di estado, Eric van der Burg, a informá Parlamento hulandes ku gobièrnu hulandes a disidí ku lo bai hiba kòmbersashon ku gobièrnunan di Kòrsou i St. Maarten pa yega na palabrashonnan ehekutabel i konkreto riba pago di e fiansanan ku tin pendiente for di 2010. El a bisa esaki den un reakshon por eskrito riba un relato di e IPKO ku a tuma lugá na Aruba na yanüari 2026. Den e karta di maneho riba Relashonnan den Reino gobièrnu di Hulanda a duna di konosé ku e kooperashon ku e paisnan riba tereno di defensa, asuntunan eksterior i seguridat konforme e responsabilidatnan stipulá den Statüt, lo kontinuá i fortifiká kaminda ta nesesario.
Den estrecho kooperashon ku Aruba, Kòrsou i St. Maarten lo sigui traha riba fortifikashon di e resistensia kontra krísis ku tin di aber ku desaroyonan geo polítiko, i poniendo enfoke riba e vulnerabilidatnan di mas importante. Mas aleu e karta ta bisa ku, den kuadro di un futuro finansa públiko mas fuerte, lo bai hiba kòmbersashon ku Kòrsou i St. Maarten i yega na palabrashonnan konkreto riba pago dje fiansanan ku ta kore for di 2010. Ku Aruba lo kòmbersá riba un lei di Reino pa ku su situashon finansiero.
