WILLEMSTAD.- Djasabra anochi a tuma lugá e presentashon dje trahe nashonal ku Miss Universe Curaçao, Kyrsha Attaf lo lusi durante dje sertámen.
E nòmber dje trahe ta ‘Dushi!’, un dje palabranan mas bunita di nos idioma Papiamentu.
E trahe nashonal di Miss Universe Curaçao 2019 ta kontené elementonan di dos dje eventonan kultural mas grandi di Kòrsou, Seú i Karnaval.
E trahe ta demostrá ku Kòrsou ta un dje islanan ku mas diversifikashon den Karibe. E kolónan ta representá un mosaiko di e meskla di kultura, kombibensia pasífiko i den harmonia.
E instrumentonan musikal ta simbolisá e músika di ‘Seú’ i ‘Tumba’. E promé ta marka e ritmo di e marcha di Seú i e otro ta marka e ritmo di Karnaval.
E kombinashon dje dos eventonan kultural importante den e trahe ta representá e poderamentu di e hende muhé.
