Lantamentu ayera na La Paz kontra dje presidente Boliviano Rodrigo Paz, di kua e manifestantenan ta eksigí su renunsia.
LA PAZ, Bolivia (AFP).- E presidente di Bolivia, Rodrigo Paz, ayera a anunsiá di lo redusí na mitar su salario i esun di su ministernan, den un intento pa suavisá e protestanan fuerte ku ta eksigí su renunsia. E mandatario sentroderechista di 58 aña ta enfrentá e pió krísis den su gobernashon kòrtiku ku a start den novèmber último.
“E presidente aki a tuma e desishon, komo parti di e esfuerso i kompromiso ku pais, pa rebaha su salario ku 50%”, segun Paz a anunsiá den un enkuentro na e siudat di Sucre. E suèldu dje gobernante na Bolivia ta di 24.000 Boliviano (3.448 US$), segun un dekreto di 2024, ku no a keda modifiká.
Paz, ekonomista di profeshon, ta bini di un famia di tradishon polítiko. Ku e promesa di kòrta 20 aña di polítika iskierdista di su antesesornan Evo Morales (2006-2019) i Luis Arce (2002-2025), Paz a aserká Merka, tambe organisashonnan finansiero internashonal i empresarionan, i a marka distansia ku e gremionan laboral.
Den e krísis ekonómiko di mas pió den kuater dékada na Bolivia, sindikatonan di kampesinonan, mineronan, maestronan i obreronan di fábrika ta den protesta for di prinsipio di e luna aki. Ademas di marchanan kasi tur dia, tin tambe blòkiamentu di rutanan rònt e pais. E protestanan a provoká riba falta di alimento, remedi i gasolin, prinsipalmente den e siudatnan di La Paz i su bisiña El Alto Oruro i Cochabamba.
