Kantidat grandi di prezunan será huntu den sèlnan dje prizòn CECOT na El Salvador. Presidente eligí di Chile a bai tuma nota kon nan a traha esei na El Salvador.
TECOLUCA, Salvador (AFP).- E presidente eligí di Chile, José Antonio Kast, ayera a bishitá e mega prizòn pa gèngnan na El Salvador, motivá pa “studia” e modelo di prizòn dje mandatario Nayib Bukele.
E bishita na “Centro de Confinamiento del Terrorismo” (CECOT) ta forma parti di un protokòl habitual di e invitadonan spesial di Bukele, kende a kombertí e prizòn den un símbolo di lucha ku a trankilisá e pais, pero tambe den blanko di denunsianan di abuso kontra di derechinan humano. E mandatario salvadoreño, kende no tabata presente durante dje rekorido, den oranan mas lat ayera a keda na risibí e chileno.
“Ta un sistema penal diferente na esun di nos, ku nos ker a studia, konosé i no nesesariamente traha unu meskos”, segun Kasta a bisa na periodistanan na e mega prizòn ku ta konta ku 15.000 prezu.
Guiá pa funshonarionan di presidensia salvadoreño, Kast a opservá e sèlnan di un parti dje prizòn, kaminda tur e prezunan bistí ku karson kòrtiku i kamisa blanku, pareu a saludá e bishitantenan.
“Bon dia”, e detenidonan ku kabes feitá i kurpa kubrí ku tatuahe, a bisa. Vários a lusi flaku i sintá ku brasanan krusá, den un intenso kalor. Impaktá pa e kondishonnan duru den e prizòn, dos periodista chileno a sali yorando. “M’a haña duele i miedu”, un di nan a bisa. E prezunan ta akusá di ta pertenesé na gèngnan peligroso.
