BOGOTA (AFP).- Presidente di Colombia, Abelardo de la Espriella, a ordená pa kuminsá e siman akí mes ku e operashonnan koordiná entre outoridat migratorio i polis pa deportá migrantenan ilegal.
E mandatario derechista a yega na poder dia 7 di ougùstùs ku un agènda di liña duru, pero ku a warda un ratu pa motibu dje temblor ku a laga 300 morto den e pais.
Pero durante di un konseho di seguridat djadumingu último, e mandatario a duna instrukshon pa identifiká i detené na promé lugá e migrantenan ku kometé delito.
“E ordu pa Migrashon ta bon kla… promé esnan ku kometé delitonan, di dos esnan ku no tin nan situashon regularisá. “Mi no ta bai aseptá migrashon ilegal. Promé e kolombianoan, di dos kolombianonan i di tres kolombianonan, esei pa tur hende komprendé”, segun el a bisa mas aleu.
Migrashon venezolano
Den último dékadanan Colombia ta e destino prinsipal dje eksodo di venezolanonan for di nan pais. Segun outoridat migratorio, 2.8 mion di migrante venezolano ta biba na Colombia te ku yüni dje aña akí. Di nan, 527.000 den situashon iregular.
Tradishonalmente e derecha kolombiano ta promové e polítika di akohida pa e diáspora venezolano ku un diskurso fuerte kontra di chavismo.
Pero De la Espriella a tuma e lema merikano “America First” di presidente Donald Trump, di kende e ta un ferviente atmirador.
“Deportá nan!” Ta un órden presidensial ku kua mester kuminsá na kumpli kuné e siman akí mes. “Mi no ta bai aseptá migrantenan ilegal, sin importá for di unda nan ta bin. “Ta un desishon polítiko ku ami ta tuma. Ta un desishon atministrativo ku ami ta tuma”, segun el a bisa.
