Presidente di ABVO, George Hernandez, a bai sosegá

Drumi dushi den brasa di señor

WILLEMSTAD.- Un berdadero shòk. Esei tabata e sentimentu den e famia di EXTRA despues di a tuma nota djabièrnè mainta di e notisia ku miembro di e hunta di Komisario di EXTRA, George Hernandez (64), a fayesé. Redakshon di EXTRA te ku djaluna último tabatin kontakto kuné.

E no a kontestá un yamada telefóniko, pero korekto i servisial manera George semper tabata el a manda un app. “Mi ta na Colombia. Dia 5 di sèptèmber mi t’ei bèk ku poder di Dios. Pa kualke kos app mi òf voice mi”, el a kontestá. Riba esaki a mand’é un app bèk bisando: “Awèl bon. Bai poko poko. Nos ta papia.” Su kontesta tabata kòrtiku i dirèkt: “Yes”. Esei tabata e último kontakto direkto kuné.

Den komunidat Hernandez tabata mas mihó konosí komo un gran sindikalista. For di aña 2000 el a fungi komo sekretario finansiero di ABVO. El a sirbi den e funshon akí bou di èks presidentenan manera Roland ‘Nacho’ Ignacio, Wendy Calmes i Adrie Williams. Den tempunan turbulento, kaminda ku e aparato públiko tabata kremp, pues ku sindikalismo tambe tabata pèrdè miembresia, Hernandez a sa di mantené e sindikato finansieramente sólido pa asina por a sigui sirbi miembronan mas mihó posibel.

Na 2021 Hernandez a postulá su mes pa e posishon di presidente di ABVO i ta logra un mayoria di voto. Na 2024 ta re-eligí Hernandez komo presidente. Bou di su presidensia, ta mira ABVO asta krese na miembresia, esaki a base di kambionan di statuto ku a hasi posibel pa ABVO representá alabes trahadónan ku no ta empleado públiko. Un kolaborashon estrecho ku e sindikato BONECO a resultá al final ku e sindikato akí a bira parti integral di ABVO i tur nan miembronan a pasa pa ABVO.

Hernandez semper tabatin penshonadonan na pechu. Bou di su presidensia e ala di penshonado di ABVO a djòin ku otro gruponan ku ta representá penshonadonan i huntu a sali pa derechonan di risibí oumento i/òf indeksashon di penshun. Hernandez su sentido di hustisia sosial tabata sumamente grandi i semper el a mantené esaki komo un prioridat den su trabounan sindikal.

Semper e tabata alkansabel. Sea ta mainta trempan, anochi lat, òf wikènt, Hernandez tabata alkansabel i disponibel pa yuda. Na hopi okashon redakshon di EXTRA a interkambiá ku su persona riba djasabra mainta òf mèrdia na sede di ABVO, òf djadumingu na telefòn. Semper e tabata kontestá ku e mesun desensia i mesun ánimo.

Na 2023 Hernandez ta keda eligí alabes komo sekretario general di e sentral sindikal CGTC. Den e ròl akí e tabata instrumental pa logra ku ta inisiá atrobe ku e plataforma di Diálogo Nashonal. Internashonalmente tambe e tabata rekonosé komo un gran sindikalista. Na 2025 el a bira ‘adjunct’ sekretario general di Karibe pa e organisashon CLATE (‘Confederación Latinoamericana y del Caribe de Trabajadores Estatales’).

Di 28 pa 31 di mei 2024 Kòrsou tabata sede di e konferensia di komishon ehekutivo di CLATE. Hernandez tabata instrumental den organisá e konferensia akí. Komo miembro di ABVO, Hernandez a okupá otro funshonnan tambe den e mundu sindikal lokal manera entre otro vise presidente di e Komishon Sentral di Sindikatonan (CCvV).

Hernandez tabata aktivo tambe den polítika. Komo lider polítiko di Partido Democraat el a enkabesá e lista kombiná DP/Laboral ku a partisipá na 2012 na elekshon pa Staten di Kòrsou. Komo profeshonal Hernandez a traha hopi aña komo hefe di departamentu finansiero di fondo di penshun APNA ku despues a bira APC.  Kombinando esaki ku su trabou sindikal, Hernandez tabata traha hopi ora pa dia i tambe den wikènt pa asina kumpli ku su responsabilidat di hefe di departamentu i alabes sirbi komo un representante sindikal.

Semper bai el a hasi esaki ku un aktitut positivo i konstruktivo. Pa ilustrá mas ainda su sentido sosial, mester bisa ku Hernandez a sirbi pa hopi aña komo tesorero i komisario den direktiva di RKSV Jong Holland. Den tempu bon i den tempu malu semper el a keda yuda su tim di futbòl faborito. Nada tabata imposibel pa Hernandez.

Pa tur opstákulo e tabata buska un solushon. El a forma parti di e komishon spesial di RKSV Jong Holland ku a organisá e selebrashonnan di 100 aña di eksistensia di e klup, presidí pa Prof. Dr. Ing. Valdemar Marcha, kaminda entre otro a trese presidente di FIFA, Gianni Infantino Kòrsou. Ta den e organisashon di e aktividatnan den kuadro di selebrashon 100 aña di Jong Holland, Hernandez via su kontaktonan, a logra haña e ekipo profeshonal Ajax dispuesto pa hunga un wega amistoso na Kòrsou.

Asina tin hopi mas ku por konta di e gran persona ku Hernandez tabata. Palabranan di kondolensia na famia-, amigu- i konosínan di George Hernandez. Kòrsou kompletu a pèrdè un gran persona ku e pèrdida repentino akí.