Kandelanan di mondi ta un problema hopi serio na Argelia. Tin diferente persona detené komo sospechosonan di ta sende e kandelanan.
ARGEL, Argelia (AFP).- Presidente argelino, Abdelmadjid Tebboune, ayera a anunsiá di ke restablesé e aplikashon di kastigu di morto pa piromannan, pa motibu dje kandelanan mortal ku a kima partinan importante den nort i ost dje pais. Dirigiendo su mes na e minister di hustisia durante un reunion di emergensia, e mandatario a ordená “un kambio di Kódigo Penal” promé ku 15 di sèptèmber.
Aunke ku kastigu di morto ta legal na Argelia, tin un moratorio vigente for di 1993. “Laga nos bin bèk ku kastigu di morto pa piromannan”, segun Tebboune, kende a pidi pa e proyekto pasa promé serka gobièrnu i despues bai Parlamento pa keda diskutí rápidamente.
“Lo realisá e ehekushon una bes ku esnan kondená a usa tur e instansianan di apelashon”, di akuerdo ku e presidente.
Kandelanan di mondi a asotá e parti nortost di Argelia den último dianan provokando gran konmoshon. Gobièrnu a dekretá tres dia di luto ofisial i kanselashon di tur festividat kultural i kompetensianan deportivo.
Segun sifranan ofisial, por lo ménos 12 persona a muri i desena a resultá heridá den e diferente kandelanan. Tin vários detenshon ku a bin ta tuma lugá.
