RIO DE JANEIRO, BRASIL, AFP.- E presidente di Brasil Jair Bolsonaro a deskartá ku e lo dekretá un lockdown nashonal, kual mayoria spesialista ta rekomendá pa kontené e di dos ola di e pandemia den e pais.
“Lo no bini un lockdown nashonal ni reglanan pidiendo pa keda kas òf sera tur kos”, asina e presidente a deklará den un akto ofisial. E ta kontra medidanan di aislamentu sosial, nashonal, regional òf lokal indikando ku e impakto ekonómiko ta desastroso.
Fundashon Oswaldo Cruz a rekomendá e lockdown aki pa “evitá mas morto. E medidanan di lockdown ta un solushon amargo, pero kompletamente nesesario den e momentu di krísis aki”, segun indikashon di e institushon djamars.
E okupashon di kamanan den unidatnan di kuido intensivo ta na “nivelnan kritiko” den 24 di 27 estado, segun e informe.
Brasil a registrá 3.829 morto kousa pa COVID djárason, un dia despues di kibra un rèkòrt di 4195 morto den apénas 24 ora.
Brasil ta na di dos lugá despues di Merka ku mas di 340.000 morto. Mart tabata e luna ku mas morto den Brasil (66.573) i den e promé shete dianan di aprel ya a registrá mas di 19.000.
