CARACAS, AP.- Presidente interino di Citgo, e filial merikano di Petroleos de Venezuela S.A, a wòrdu detené pa delitonan di korupshon relashoná ku e firmamentu di kontraktnan, segun anunsio di e Fiskal General venezolano.
E fiskal general Tarek William Saab a bisa den un rueda di prensa ku seis gerente, entre nan e presidente aktual Jose Pereira, a wòrdu detené pa fasilitá kontraktnan den kondishon desbentahoso pa Citgo, ku ta manehá tres refineria na Illinois, Texas i Louisiana ku un kapasidat di 749.000 bari pa dia.
E seis personanan aki a wòrdu akusá di malversashon di fondonan públiko, asosiashon di kometé delito, entre otro delitonan.
E otro sinku detenidonan a wòrdu identifiká komo Tomeu Vadell, visepresidente di Operashon di refinashon, Alriio Zambrano, visepresidente i gerente general di Refineria Corpus Christi; Jorge Toledo, visepresidente di Suministro i Komersialisashon; Gustavo Cardenas, visepresidente di Relashon Stratégiko ku Akshonistanan i Gobièrnu i Jose Luis Zambrano; visepresidente di Servisio Kompartí.
E fiskal general a indiká ku ta wardando detenshon di algun persona mas próksimamente.
Entre iregularidatnan detektá, tin un dokumento ku a wòrdu firmá riba 15 di yüli tokante un akuerdo pa refinansiá programanan di bono 2014 i 2015 pa 4.000 mion dòler. Esnan involukrá a ofresé informashon konfidensial na por lo ménos un kompetidó, segun Saab.
E dokumento a establesé kondishonnan di préstamo “faborabel” pa PDVSA, ofresiendo Citgo komo garantisá, loke a pone stabilidat di e empresa na riesgo, asina el a agregá.
