BOGOT, COLOMBIA, AFP.- E presidente di Colombia, Gustavo Petro, a pidi pa liberá Julian Assange, e fundadó di WikiLeaks detené na London i akusá ku spionahe di Merka.

“Mi a reuní ku boseronan di WikiLeaks, pa sostené e lucha mundial pa libertat di e periodista Julian Assange”, asina e mandatario a publiká riba Twitter. El a agregá un potrèt ku dos delegado di WikiLeaks na e sede di gobièrnu huntu ku su tweet.

E presidente a primintí ku e lo pidi presidente merikano Joe Biden i “algun presidente mas den Latinoamérika pa nan no imponé sanshon kontra e periodista djis pasó el a bisa e bèrdat”.

Den yüli, e presidente di Mexico, Andres Manuel Lopez Obrador a ofresé protekshon i asilo na Assange, investigá na Merka pa publiká mas ku 700.000 dokumento konfidensial tokante aktividatnan di ehérsito merikano na aña 2010.

E oustraliano di 51 aña, por haña un kondena di 175 aña den prizòn si deklar’é kulpabel na Merka.

E gobièrnu britániko a bai di akuerdo ku su ekstradishon, pero Assange a apelá esaki.

 

LAGA UN KOMENTARIO

Please enter your comment!
Please enter your name here