E presidente di Líbano Joseph Aoun
BEIRUT, LÍBANO, AFP.- E presidente di Líbano, Joseph Aoun, a selebrá e akuerdo anunsiá entre Merka i Iran, pa pone fin na e guera den Medio Oriente. El a hasi esaki durante un yamada ku e minister di eksterior iraní Abbas Araghchi.
Aoun a bisa ku e ta spera ku e akuerdo ta “un paso positivo pa redusí tenshon i habri portanan pa solushonnan diplomátiko”. Segun un komunikado, Araghchi a pone énfasis riba e “importansia pa respetá soberania di Líbano”.
E agensia estatal di Iran, IRNA, a informá ku Araghchi a papia ku e presidente di parlamento libanes, Nabih Berri, tambe. E ta aliado di e grupo armá Hezbollah, kual ta den guera ku Israel na Líbano desde 2 di mart.
Durante e yamadanan, Araghchi a splika detayenan di e akuerdo ku Merka, spesialmente e puntonan relashoná ku Líbano, segun indikashon di IRNA.
Aparte di esaki el a bolbe afirmá e kompromiso di Iran pa pone fin na e guera den Líbano i a bisa ku ta nesesario pa para e atakenan di Israel por kompleto.
Segun IRNA, outoridatnan libanes a gradisí Araghchi pa inkluí fin di e guera na Líbano den e akuerdo ku Merka.
Sinembargo, Hezbollah a afirmá djaluna ku a logra derotá forsanan di Israel ku tabata purbando di avansá na sùit di Líbano, apesar di e akuerdo entre Merka i Iran.
