LIMA, AP.- E presidente peruano Martin Vizcarra a bisa ku e ta komprondé e situashon “difísil” di Alberto Fujimori i su famia pero a señalá ku e mester kumpli ku e desishon di hustisia kual a anulá un indulto médiko otorgá na e eks gobernante. E anulashon di e indulto aki ta oblig’é pa regresá prizòn i asina sinta su kondena pa abusu kontra derechi humano.
Den un entrevista djaweps anochi na e televishon estatal, Vizcarra a afirmá ku den e kaso aki, “loke mester hasi ta respetá un desishon di e poder hudisial”.
Vizcarra no a rospondé kon lo prosedé si Fujimori presentá un solisitut nobo di indulto desde prizòn. El a indiká djaweps ku legisladornan di un fakshon Fujimorista a presentá un proyekto di lei pa e prizoneronan di 80 aña òf mas liberá di forma antisipá si nan a kumpli ku por lo ménos tres kuart parti di e sentensia. E proyekto di lei a wòrdu kalifiká pa krítikonan di Fujimori komo un inisiativa elaborá kontra e eks presidente.
Fujimori a publiká un video kaminda e ta hasi un yamada dramátiko pa e no wòrdu mandá prizòn atrobe. E hòmber di 80 aña a sigurá ku dor di debolb’é prizòn esaki ta su kondena di morto.
