LIMA, PERU (AFP).- Presidente di Perú, Dina Boluarte, investigá pa Ministerio Públiko pa algun oloshi di luho ku e no a deklará entre su propiedatnan, den un mensahe na e nashon a sigurá ku su persona ni su gobièrnu no ta korupto, ounke el a evitá di referí na e kaso “Rolexgate”.
Boluarte a papia durante di 5 ora for di Kongreso meimei di protesta di desena di manifestante kendenan a marcha kontra di su gobièrnu pafó di sede di parlamento den sentro di Lima.
“Kore ku Dina i e kongreso korupto”, segun bòrchinan grandi dje manifestantenan, entre nan habitantenan dje region andino di Puno.
Sin menshoná e investigashon ku for di mart Ministerio Públiko tin kontra di su persona, Boluarte a defendé gobièrnu i a papia di transparensia.
“Ni e presidente aki, komo tampoko ningun di nos ministernan, ta envolví den aktonan di korupshon. “Anto esei no por ta e kaso tampoko pasobra e ministernan a hura nan funshon bou di un kompromiso bon kla, i pasobra e presidente aki lo no tolerá nada”, segun e mandatario.
Boluarte, di 62 aña, i kende a asumí poder dia 7 di desèmber di 2022 despues di destitushon i aresto dje mandatario di e tempu ei, Pedro Castillo, a indiká ku su gobièrnu ta “komprometé den un lucha firme i sigur kontra di korupshon”.
Fiskalnan ta investigando e presidente relashoná ku “tres oloshi marka Rolex ku el a risibí komo donashon dje gobernador regional di Ayacucho, Wilfredo Oscorina, huntu ku renchi di orea di oro ku djamanta i un pulsera Bangle ku 94 piedra briante”.
Por hiba Boluarte Korte solamente ora ku e baha komo presidente, den yüli di 2026, segun konstitushon.
Ku su kaso, ta seis e presidentenan peruano impliká den kasonan di korupshon den e último kuart di siglo. Den apénas ocho aña, Perú a konosé seis mandatario.
