MADRID, SPAÑA (AFP).- Kongreso di Spaña a reeligí e sosialista Pedro Sanchez komo presidente di gobièrnu di Spaña despues ku el a primintí un lei di amnistia pa e independistanan catalán. Un posishon ku a trese hopi malkontentu den komunidat spañó i huntu ku esei akusashonnan fuerte di parti di oposishon.
“Mi ta deklará di otorgá e konfiansa di Kongreso na don Pedro Sanchez”, segun anunsio dje presidente di Kongreso di Diputadonan, Francina Armengol, despues di anunsiá ku 179 di e 350 diputadonan a vota na fabor dje kandidato, miéntras ku 171 a vota kontra.
Sanchez, di 51 aña, a yama danki na e “179 diputadonan ku a komprometé nan voto i ku ta representá nada mas i nada ménos ku e 12.6 mion siudadanonan di nos pais”.
E kandidato a risibí e apoyo di su Partido Socialista (121 diputado), tambe di e partido di iskierda radikal Sumar (31), di e formashonnan independista catalán Junto por Cataluña (7) i Izquierda Republicana de Catalauña (7), di Partido Nacionalista Vasco (PNV, 5), dje independentista vasco Bildu (6), i di e úniko diputado di Coalición Canaria.
“Mi sa ku e proseso ku a trese nos na e dia aki i e momento presis aki no tabata fásil pa bosnan, komo tampoko e tabata pa mi”, Sanchez a atmití dirigiendo su mes na su diputadonan sosialista, un di nan ku ayera a risibí un webu di parti di manifestantenan serka dje Kongreso.
E apoyo dje shete diputadonan di Juntos por Cataluña di Carles Puigdemont tabata esun ku mas a resistí pa duna voto na Sanchez, pa finalmente risibí e promesa di amnistia pa e independistanan catalán ku tabata impliká den e protestanan di 2017.
Oposishon a akus’é di a entregá kontrol di gobièrnu na un “hende ku ta hui”, refiriendo na Puigdemont ku a instalá su mes den 2017 na Bèlgika, huyendo di hustisia spañó, avisand’é ku lo e ta un prezu di e demandanan independista.
“M’a bisa e presidente di gobièrnu ku e kos aki ta un kibokashon”, segun e lider di oposishon, e konservador Alberto Núñez Feijóo, di Partido Popular (PP), ku a atvertí Sanchez ku e ta serando “un kontrakt mensual” ku esnan pro independensia di Cataluña
Pero Sánchez, un polítiko ku a yega na poder den 2018 durante di moshon di sensura a demostrá di sa kon pa saka su kurpa for di situashonnan fèrfelu.
