SANTO DOMINGO (AFP).- E presidente dominikano Luis Abinader a konsolidá su poder ku su re-elekshon ku márgen amplio, ku ta asentuá e éksito di su polítika ekonómiko i spesialmente kontra di migrashon di Haiti.
Ayera mainta, ku kasi 52% di votonan kontá, Abinader tabatin 57.15% di voto na su fabor, 28 punto riba su siguidó di mas serka di su ocho rivalnan, e eks-mandatario Leonel Fernandez (29.34%).
“Repúblika Dominikana awe ta skibi un página di avanse demokrátiko i e resultadonan ta papia pa nan mes”, segun e gobernante di 56 aña. “Komunidat a papia ku klaridat… mi ta asumí e konfiansa ku m’a risibí i e obligashon pa no defroudá. “Lo mi no faya ku bosnan”, segun Abinader, kende dia 16 di ougùstùs lo kuminsá ku su di dos mandato di kuater aña.
Su forsa tambe ta visibel den Kongreso, kaminda su Partido Revolucionario Moderno (PRM) i aliadonan a logra bentahanan amplio. Den Senado, segun resultadonan parsial, nan ta dominá 24 dje 32 provinsianan.
“Ta un gran demostrashon di poder ku e pueblo dominikano a duna na presidente Abinader”, segun Nelson Espiral, spesialista na Harvard University.
Rep. Dominikana i Haiti ta kompartí e isla karibense La Española, pero ta eksistí un kontraste fuerte entre e dos paisnan. Nan bisiña pober ta hogá den káos i violensia di gèngnan kriminal ku ta kontrolá bon parti dje teritorio.
For di momento di a yega na poder den 2020, e mandatario a hiba un polítika di man fuerte kontra migrashon haitiano. El a multipliká razia riba esnan sin dokumento i deportashon, tambe reforsá presensia di forsa armá na frontera, i a lanta un muraya di 164 km entre e dos paisnan, ku el a primintí pa hasi ainda mas largu den su di dos mandato.
“Awe nos a skucha palabra di dominikanonan ku a aprobá e esfuerso ku nos a hasi te awor den un gobièrnu honesto, ku transparensia i ku efisiensia”, segun e presidente, kende a yega na poder ku un diskurso kontra korupshon.
