Daniel Noboa, presidente di Ecuador.
QUITO, Ecuador (AFP).- E presidente di Ecuador, Daniel Noboa, a tilda komo “miserabel” e representantenan di gobièrnu di Venezuela despues di e anunsio di parti di e presidente Nicolás Maduro, ku nan no ta aseptá e akuerdo di repatriashon ku Merka mas. E desishon dje mandatario venezolano di forma direkto ta un reakshon riba e desishon di gobièrnu norteamerikano pa revoká e lisensia di Chevron pa operá den e pais karibense.
“Ta algu miserabel i un falta apsoluto di empatia ku gobièrnu di un pais ta e rechasá su mes hendenan. “Esei ta manera di aktua di régimennan outoritario i ekstremista, sin importá e destino di esnan ku a hui pa e krísis”, segun Noboa a skirbi riba X.
Noboa a akusá Maduro di a “atvertí” Merka tras di porta será riba e posibilidat di hala tras for di akuerdo di repatriashon entre Venezuela i Merka despues di un promé aserkamentu na kabamentu di yanüari. Esaki despues di sinku aña di relashon konhelá entre e dos paisnan.
Despues dje negosiashon ei, Venezuela a repatriá 366 di su siudadanonan deportá for di Merka.
Donald Trump a bisa ku e desishon di revoká e lisensia di Chevron pa operá riba teritorio venezolano ta relashoná ku e falta di garantianan demokrátiko despues dje elekshon presidensial di yüli 2024.
E elekshon enkuestion a duna Maduro komo ganadó pero esaki meimei di denunsia di froude.
Maduro a respondé djasabra ku un akto públiko bisando ku “merikanonan a daña e komunikashon ku nos a inisiá. I esei ta afektá ”e biahenan (di migrantenan deportá) ku ya nos tabatin programá”.
Segun Noboa, e desishon venezolano tin impakto riba hinter e region, aksentuando ku Ecuador ya lo no risibí “migrantenan deportá di otro nashonalidatnan”.
