Presidente eligí di Costa Rica, Laura Fernandez, den su diskurso di viktoria despues di a gana elekshon djadumingu último.
SAN JOSE, Costa Rica (AFP).- E presidente eligí di Costa Rica, e derechista Laura Fernandez,a bisa ayera di ta konta ku e mandatario salvadoreño, Nayib Bukele, pa “subi bon kaminda” den e pelea ku e mester hiba kontra di narkotráfiko. Bukele, kende a dialogá ku Fernandez despues di esaki su viktoria aplastante den elekshonnan di djadumingu último, ya a asesorá e gobièrnu aktual di Rodrigo Chavez den konstrukshon di un prizòn inspirá pa e megaprizòn salvadoreño pa gènnan.
Den e kòmbersashon, Bukele “un biaha mas a komprometé su mes di sigui kolaborá pa e pais por realisá un proyekto asina (di prizòn) i hopi otro mas, kaminda El Salvador lo ta e ehèmpel”, segun e mandatario.
E ofensiva di Bukele kontra di gènnan a redusí violensia den e pais te na un mínimo históriko, aunke organisashonnan di derechinan humano ta denunsiá violashonnan grave di derechinan humano.
“Mester kòrta e konekshon di krímen organisá ku e mundu eksterior”, i pa e motibu ei “e prizòn ei mester bira un realidat”, segun Fernandez, kende ta un èks-minister di e presidente Chaves.
Costa Rica, durante di dékadanan konsiderá un dje paisnan mas ‘safe’ di e kontinente, a bira un lugá di tránsito i un sentro logístiko di eksportashon di droga pa Merka i Europa, segun direktor di “Organismo de Investigacion Judicial”, Michael Soto. Debí na esei, inseguridat ta e preokupashon prinsipal di kostarisensenan, ku djadumingu último a duna apoyo amplio na Fernandez pa gana den e promé buèlta elektoral i tin un mayoria den parlamento.
Durante dje gobièrnu di Chaves, asesinatonan a alkansá un pik históriko di 17 pa kada 100.000 abitante, pa kua ta mustra dede riba poder hudisial pa no a hasi e medidanan kontra di kriminalnan mas fuerte.
