KINGSTOWN(AFP).- E presidente guyanes, Irfaan Ali, a bisa ayera den e kumbre di CELAC ku su pais ke mantené pas ku su bisiña Venezuela meimei di un pleitu di shen aña riba soberania dje teritorio Esequibo, ku a bira mas fuerte na kabamentu di 2023.
“Nos ke pas, nos ke prosperidat pa nos bisiñanan i pa nos mes den e region”, segun Ali den e plenaria dje enkuentro di Komunidat di Estadonan Latinoamerikano i Karibense (CELAC) na St. Vincent and the Grenadines. “Mi ta dispuesto na papia ku presidente Maduro riba kualke aspekto ku por kontribuí na mehorá e relashon entre nos dos paisnan”.
E tenshon entre ámbos pais a trese un miedu regional riba e posibilidat di un konflikto armá pa e zona ku ta riku na petrolio, atministrá pa Guyana. Ali i Maduro den desèmber último, a komprometé nan mes durante di un reunion pa no hasi uso di forsa.
Ayera e mandatarionan a bolbe topa kara kara den un enkuentro mas trankil durante kua Ali a entregá un bòter di ròm i un medaya di su pais na Maduro, kende a gradisí pa e gesto ku un kaha yená di produktonan venezolano. “Pas i amor”, Maduro a bisa na ingles.
Venezuela ta para’riba ku Esequibo ta parti di su teritorio for di tempu ku e pais tabata kolonia di Spaña i a apelá na un Auerdo di Ginebra, firmá den 1966, promé ku e independensia di Guyana for di Reino Uní.
“Nos ta dispuesto na aseptá e sentensia di Korte Internashonal riba e asuntu aki”, segun Ali a bisa
Ounke ta trata di un pleitu di shen aña, e disputa a kue forsa den 2015 despues ku a deskubrí áreanan grandi di krudo den e zona en kuestion.
E tenshon a oumentá ku e selebrashon, dia 3 di desèmber di 2023, na Venezuela, di un referendum riba soberania di Esequibo i despues ku yegada di un barku di guera britániko den laman guyanes, riba kua na Caracas nan a respondé mobilisando mas di 5.600 hòmber den ehersisio militar serka dje sitio den disputa.
