WILLEMSTAD.- E presidente interino di Banko Sentral di Korsou i St.Maarten sr. Bob Traa a entregá su karta di retiro na hunta di komisario di e instituto ayera djaweps 28 di novèmber. Den su karta Traa ta informá e hunta ku pa motibunan personal e ta bandoná e funshon komo presidente interino di CBCS. Den un informe ofisial, hunta di komisario ta bisa ku nan ta lamentá e desaroyo aki pero ta respetá e desishon di Traa kende a indiká ku ta un desishon personal.
Banko Sentral ta informá ku Traa a nifiká hopi pa e instituto den e periodo kòrtiku ku el a funshoná komo presidente. Danki na su konosementu i eksperensia amplio el a duna bon kontenido na problemátikonan riba tereno makro ekonómiko ku ta importante pa e paisnan Korsou i St. Maarten. Su estilo di maneho a pone ku e por a hala koleganan di e diferente disiplinanan trese huntu den e proseso di toma di desishon. E por a dil ku e retonan ku e instituto ta konfrontando i tabata trata koleganan ku rèspèt i amabilidat.
CBCS ta indiká ku Traa ta baha ofisialmente dia 31 di desèmber 2019 i pa loke ta trata su susesor e instituto lo duna informashon di esei mas despues.
