E potrèt akí, emití pa Palasio Miraflores, ta mustra e presidente interino venezolano, Delcy Rodriguez (meimei), tambe minister di interior di Venezuela, Diosdado Cabello (r) i presidente di Asamblea Nashonal di Venezuela, Jorge Rodriguez (d), despues dje seremonia di instalashon di Rodriguez.
CARACAS (AFP).- Delcy Rodriguez a keda instalá komo presidente enkargá di Venezuela ayera, pa motibu di ousensia di Nicolás Maduro, kende el a primintí di lo reskatá. Rodriguez tabata vise presidente di Maduro i promé den liña di suseshon. E ta bira e promé hende muhé pa goberná e pais. “Mi ta bin ku e doló pa sekuestro di dos héroe kende awor ta detené na Merka”, Rodriguez a bisa. “Tambe mi ta bin ku honor pa hura na nòmber di tur venezolano”.
E presidente interino a asumí e funshon pa 90 dia, ku por keda prolongá. Su ruman, e hefe di Parlamento, Jorge Rodriguez,a presidí e akto di instalashon. E yu di Maduro, e tambe diputado Nicolas Maduro Guerra, a sostené e Konstitushon riba kua e presidente interino a hura.
Rodriguez a bisa di ta tuma e presidensia “den oranan teribel di menasa kontra di stabilidat di pas dje nashon”. Militarnan a rindi honor na e presidente interino na final dje seremonia. Forsa Armá a rekonosé su designashon.
Delcy Rodriguez a trese dilanti ku “mi funshon prinsipal pa e dianan aki ta rekerí na tur prosedimentu, na tur e tribunalnan pa logra trese bèk Nicolás Maduro Moros, mi ruman, mi presidente”. E seshon a kuminsá ku e gritu “Vamos Nico!”, un ‘slogan’ ripití hopi den e kampaña elektoral di 2024 di Maduro, kende su re-elekshon no a keda rekonosé pa oposishon i Merka i vários otro pais. Un potrèt di Nicolás Maduro i su kasá a keda desplegá den tribuna. Na momento dje huramentashon.
