WASHINGTON, USA (AFP).- Outoridatnan norteamerikano ta investigá e presidente kolombiano Gustavo Petro pa supuesto relashon ku narkotráfiko, segun a keda publiká ayera den The New York Times. Por lo ménos dos linia di investigashon a keda habrí pa ministerio públiko di Manhattan i di Brooklyn (New York), ku kolaborashon di agensia anti droga (DEA) i Departamento di Seguridat Nashonal, segun e reportahe, ku ta sita fuentenan di gobièrnu di Donald Trump.
DEA i Departamento di Hustisia a nenga na komentá riba e artíkulo. E relashonnan entre Merka i Colombia, partikularmente entre Trump i Petro, rápidamente a drenta den un fase no muchu bon ora ku e republikano a regresá White House un aña pasá. E gobiernu di derechi di Trump hopi lihé a klèsh ku e proyekto iskierdista di Petro, den poder for di 2022.
E ofensiva norteamerikano lansá den sèptèmber último kontra di “speedboat” nan supuestamente kargá ku droga, promé en Karibe i despues tambe den Pasífiko, a inaksentuá e tenshon diplomatiko. Petro a akudí na e Asamblea General di Nashonnan Uni, i a partisipá despues di protesta den kayanan di New York durante kua a hasi yamada na militarnan merikano pa no sigui òrdunan di Trump.
Meimei di un guera di palabra entre e mandatarionan, Washington a kita visa for di Petro i a apliká sanshonnan ekonómiko kontra di su persona i vários miembro di su famia. Te hasta el a menasa ku akshonnan Militar na Colombia.
Pero último aki nan a dialogá i a tabatin un bishita dje kolombiano na Washington, ku a tuma lugá den febrüari último.
