Kolombianonan ta hasi orashon na aire liber pidiendo pa salú dje kandidato presidensial Miguel Uribe. Tin kuater detenshon den e kaso di tiramentu dje parlamentario di 39 aña.
BOGOTA (AFP).- Famia dje aspirante presidensial tirá na Colombia a presentá un demanda penal kontra dje presidente kolombiano, Gustavo Petro, pa hostigamentu i pa a krea odio riba retnan sosial.
E mandatario iskierdista a tene “diskursonan di odio i ku ta stigmatisá” kontra dje senador Miguel Uribe promé ku e atentado, dia 7 di yüni, den kua esaki a resultá heridá pa e impakto di tres bala. Esei di akuerdo ku e hurista Victor Mosquera.
E denunsia a keda hasí na un komishon investigadó di Parlamento ku por pasa e denunsia pa Korte Supremo, enkargá pa husga presidentenan dje pais.
Uribe, un dje mayor figuranan di oposishon di derecha, ta hospitalisá despues di a hasi por lo ménos kuater operashon.
Un menor di 15 aña i tres mayor ta detené pa nan aparente partisipashon den ehekushon dje atake. Outoridatnan ainda ta buska e posibel outornan intelektual.
Petro konstantemente tabata kritiká e dirigente polítiko di 39 aña riba retnan sosial, akusando e di a stroba algun proyekto di su gobièrnu.
Dos dia promé ku e atentado e presidente kolombiano a tilda Miguel Uribe di ta”ñetu di un presidente ku a ordená tortura di 10.000 kolombiano”, refiriendo na e ekspresidente Julio César Turbay (1978-1982), kritiká den su tempu pa a ordená un kampaña di persekushon feros kontra miembronan di gueria M-19, na kua Petro a pertenesé.
E abogado a trese dilanti ku e famia ta konsiderá ku Petro a generá un “ambiente ku por a kondusí na e atentado” i ta sigurá di tin prueba di por lo ménos shen publikashon dje estilo realisá pa e presidente riba X.
