HANOI (AP).- Presidente kubano Raúl Castro ayera a kuminsá un bishita na Vietnam, un pais komunista ku ta floresiendo ekonómikamente despues di a adoptá kapitalismo.
E lider di e partido gobernante Partido Komunista, Nguyen Phu Trong, a yama Castro bonbiní den palasio presidensial, na Hanoi.
E gobernante kubano a kòmbersá despues ku porta será ku e máksimo dirigentenan di e pais, presidente Truong Tan Sang i e promé minister Nguyen Tan Dung. E bishita di kuater dia ta buska manera pa drecha e lasonan entre e dos aliadonan bieu.
‘Nos relashon a desaroyá, pa hopi tempu, riba e base di nos historia riku’, asina Castro a bisa. ‘Ora un pais ta den nesesidat, nos ta yuda otro i nos ta kompartí hopi punto di bista komun riba temanan global’, asina el a agregá.
Castro a bishitá China siman pasá, kaminda el a firma un seri di akuerdo, inkluí un donashon i un préstamo sin interes pa yuda impulsá e ekonomia kubano.
Su biahe as iát iko ta wòrdu konsiderá un oportunidat pa mira e meskla di sosialismo i kapitalismo den funshonamentu. Vi e tnam i China a adoptá reformanan di e ekonomianan di merkado i nan a eksperenshá un kresementu rápido, miéntras ku gran parti di Cuba ta pober ainda.
Vietnam a kuminsá ku e restrukturashon di su sistema meimei di dékada di 1980, despues ku e frakaso di e agrikultura kolektivo a laga e pais pober despues di e Guera di Vietnam. Aktualmente, e ta e di dos eksportadó di aros mas grandi di mundu i ta e fuente mas grandi di importashonnan di e grano básiko aki na Cuba.
E último bes ku Castro a bishitá Vietnam tabata na 2005, komo minister di Defensa, promé ku el a remplasá su ruman Fidel komo presidente di e isla karibense na 2008. E komersio bilateral a subi na 274 mion dòler aña pasá.
