SAO PAULO, Brasil (AFP).- E presidente de Brasil, Luiz Inácio Lula da Silva, di 79 aña, awe lo bolbe hasi un operashon na kabes pa “redusí e riesgo di sangramentu den futuro”, dos dia despues di a keda operá pa un hematoma intrakranal, segun su ekipo médiko a duna di konosé.
Lula a keda trasladá djaluna anochi for di Brasília pa Hospital Sirio-Libanés di Sao Paulo despues di tabatin doló di kabes. Dòkternan a konstatá ku e tabatin un “hemorragia
intrakraneal”, konsekuensia di un kaida ku el a sufri dos luna pasá i a disidí pa realisá un operashon di urgensia djamars mardugá.
E dòkter Robert Kalil, médiko di Lula, a bisa periodistanan ku e prosedimentu ta “relativamente simpel” i di “riesgo abou”. E meta ta pa baha e riesgo di sangramentu den futuro.
Dòkternan a bisa ku e mandatario a pasa e dia di ayera bon, sin komplikashon, i a realisá fisioterapia, el a kaba i a risibí bishita di famianan miéntras ku el a permanesé bou di “kuido intensivo” e siguiente dia di un operashon di emergensia pa para sangramentu den kabes.
Dia 19 di òktober Lula a kai den baño di e residensia ofisial i a dal parti patras di su kabes na suela. E mester a risibí algun ganchu pa sera e herida.
Pa motibu dje aksidente ei na kas e mester a kanselá vários biahe pa eksterior, entre nan pa Rusia kaminda e mester a tuma parti na e kumbre di BRICS.
