Presidente mehikano Claudia Sheinbaum kende ke konvensé mundu ku su pais lo ta ‘safe’ pa Kopa Mundial.
CIUDAD DE MEXICO (AFP).- Presidente di Mexico, Claudia Sheinbaum, ayera a deskartá e riesgonan pa fanátikonan ku lo bishitá Guadalajara, un dje sedenan di Mundial di futbòl di 2025, despues ku un figura grandi di narkotráfiko a keda likidá pa militarnan. E insidente akí a provoká temor den e siudat i den gran parti dje pais.
Sheinbaum den konferensia di prensa a sigurá ku “no ta eksistí ningun riesgo” pa e bishitantenan i a ofresé “tur garantia” pa e metropol parti wèst di México por risibí e kuater weganan programá den su teritorio den yüni benidero. Djadumingu, e violensia kriminal a lanta kabes ku morto dje lider di trafikashon di droga Nemesio Oseguera, lider di “Cartél Jalisco Nueva Generación” (CJNG), den un operashon militar.
Tantu durante dje operashon i despues di enfrentamentunan no ménos ku 27 agente di seguridat a pèrdè nan bida, ademas di 46 supuesto kriminal i un sivil, segun outoridatnan a informá.
CJNG a respondé ku un atake formal ku kimamentu di vehíkulonan, tambe di negoshinan i blòkiamentu di kaminda den 20 dje 32 estadonan dje pais, lagando imágennan ku a bai rònt mundu na momento ku falta kuater luna pa e máksimo enkuentro di futbòl, ku lo hunga di 11 di yüni pa 19 di yüli.
Un bosero di FIFA a bisa na prensa ku pa e momento akí e organisashon lo no duna komentario riba seguridat durante dje Mundial.
Ademas di kuater enkuentro dje fase di gruponan dje Mundial, Guadalajara huntu ku Monterrey ta sede di un torneo na fin di mart awor pa definí e dos último paisnan pa klasifiká pa Kopa di Mundu. E kompetensia ei lo konta ku seis selekshon: Bolivia, Repúblika Demokrátiko di Kongo, Irak, New Caledonie, Jamaica i Sürnam.
