CIUDAD DE MEXICO (AFP).- E Presidente mehikano, Claudia Sheinbaum, a bisa di ta “konvensí” ku e relashon ku Merka “lo ta bon, ku rèspèt i ku diálogo lo prevalesé” den kontakto ku e republikano Donald Trump.
“Pero un kos sí, semper nos lo tin kara na laira. Mexico ta un pais liber, independiente i soberano i manera m’a bisa, nos lo koordiná, kolaborá pero nunka nos lo ta supordiná”, segun e mandatario ayera dilanti di míles di simpatisante na Zócalo, Ciudad de Mexico, selebrando 100 dia na poder.
Trump a menasá ku un deportashon masivo di migrantenan despues ku e asumí poder dia 20 di yanüari awor.
Sheinbaum a referí na e envio di alrededor di 65.000 mion dòler di mehikanonan na Merka pa nan famianan durante e último aña. El a asentuá ku e relashonnan ku e pais “ta kontribuí na e ekonomia di Mexico pero mester skucha bon, nan ta kontribuí mas tantu na ekonomia di Merka”.
E evento a kuminsá ku ‘Himno Migrante’, un kansion ku ta rindi tributo na mehikanonan na Merka. E enkuentro tambe a start ku un homenahe na e komunidatnan indígena di Mexico.
“E Presidente ta na altura di e espektativanan pa loke ta trata e menasanan di Trump. E no ta baha kabes i esei ta bon”, segun Reynol Chamec Cruz, funshonario di gobièrnu.
Pa loke ta trata e anti narkoviolensia, ku tambe a marka su promé 100 dianan na poder, Sheinbaum a reportá un bahada di 16% di asesinatonan doloroso entre sèptèmber i desèmber di aña 2024.
“Ainda tin hopi inseguridat pero nos ta spera di logra pas den e pais”, segun un otro siudadano a bisa.
“No mester tin duda, e poder hudisial ta outónomo”, segun Sheinbaum, defendiendo e reforma di poder hudisial ku a trese polémika. El a asentuá ku riba 13 di yüni di aña 2025 lo tin e elekshonnan pa renobá husgadónan federal di Korte.