Palestinonan ta karga kurpanan sin bida di famianan ku a muri despues ku Israel a bombardiá un skol den Gaza, konbertí den un ‘shelter’.
GAZA, Palestina (AFP).- E presidente di Outoridat Palestino, Mahmud Abas, a hasi un yamada riba Hamás pa liberá tur e rehennan. Segun Abas, e sekuestro ta duna Israel “esküs” pa ataká Gaza, kaminda trahadónan di reskate a rekuperá kadavernan kimá despues di un bombardeo israelí.
Defensa Sivil dje ‘strook’ di Gaza a anunsiá ku sigur 18 persona a muri debí na bombardeonan israelí den teritorio Palestino. Israel, dia 18 di mart a reanudá su ofensiva aéreo i riba tera riba Gaza despues di kasi dos siman sin atake den guera kontra dje movementu islamita Hamás.
“Hamás a duna un esküs pa e okupashon kriminal por sigui kometé krímennan den Gaza, esun mas fuerte for di tempu ku a kue rehennan”, segun Abás na Ramala, sede dje Outoridat Palestino den Cisjordania okupá.
“Nos pueblo ta pagando e preis, no Israel. Mi ruman, “entregá nan”, el a agregá.
E relashon entre e partido Fatah diAbás i Hamás ta tenso ya pa kasi dos dékada, ku divishonnan polítiko i ideológiko profundo.
Mientrastantu, Israel a sigui bombardiá Gaza, 11 persona a muri den un atake kontra di un skol kaminda tabatin refugiadonan den e siudat di Gaza den nort.
“E bombardeo a proboká un kandela grandi den e edifisio i a bin haña vários kurpa karbonisá”, segun el a a bisa. Otro kuater persona a muri durante di un atake israelí riba vários kas den ost di Siudat di Gaza”, di akuerdo ku Basal.
Por lo ménos 1.928 persona a muri den Gaza for di despues ku a reanudá e ofensiva israelí den luna di mart, segun datonan di Ministerio di Salú dje teritorio, goberná pa Hamás. E balansa total dje guera a subi te na 51.305 morto.
