LIMA, Perú (AFP).- Presidente di Perú, Dina Boluarte, a proponé kastigu di morto pa violadornan di menornan di edat, esaki despues di asesinato di un mucha muhé di 12 aña kende aparentemente a keda agredí seksualmente den wikènt último den un bario pober di Lima.
Na fabor di man duru kontra di delinkuensia, e mandatario konservador a duna di konosé ku “a yega e momentu pa diskutí pa trese bèk e pena kapital”, ku a keda abolí den 1979 i ku pa dékadanan a keda reservá pa delitonan manera traishon kontra di patria di homisidio grave.
“Ta momentu pa teniendo kuenta ku susesonan dje magnitut ei, ku mester ta inakseptabel den un sosiedat, pa nos plantia medidanan drástiko. ”Ta momentu pa habri e debate riba kastigu di morto pa violadornan di menornan di edat”, segun Boluarte a bisa.
Durante di un seremonia dilanti di Forsa Aéreo di Perú, e mandatario a ekspresá su indignashon pa e asesinato di un mucha muhé kende su kurpa a keda haña lorá den tapeit bou di kama dje aparente agresor kende a keda detené pa polis.
“Nos no por permití ku e tipo di hende asina ta kana liber riba kaya. No mester tin ningun tipo di pordon pa esnan ku tribi na mishi ku nos muchanan, ku ta esnan mas sagrado pa nos famianan peruano”, segun e presidente.
Kastigu di morto por keda restablesé den e pais solamente mediante un reforma di lei aprobá pa Kongreso. E inisiativa, sinembargo, lo bai kontra di kompromisonan internashonal ku Perú a asumí den defensa di derechinan humano i kontra di tipo di kastigu asina.
