Presidente saliente di Costa Rica Rodrigo Chaves (r) huntu ku presidente eligí Laura Fernandez, kende djabièrnè awor lo tuma mando na e pais.
SAN JOSE, Costa Rica (AFP).- E mandatario saliente di Costa Rica, e derechista Rodrigo Chaves, lo forma parti dje gabinete di su susesor Laura Fernandez den un puesto ku podernan amplio, ku ademas lo garantis’é inmunidat kontra di eventual prosesonan legal.
Chaves, kende djabièrnè awor lo entregá e mando na Fernandez, ayera a keda designá komo minister di presidensia. Lo e ta enkargá ku relashonnan ku demas podernan di estado, ku kualnan e aktual gobernante tin un enfrentamentu fuerte. Ademas, lo e tin bou di dje e Direkshon di Inteligensia i Seguridat (DIS), señalá den pasado di parti di opositornan pa supuesto spionahe polítiko, loke a keda rechasá dor di gobièrnu. Na mes momento lo e ta minister di finansa i kordinadó dje gabinete ekonómiko.
Fernandez (39) ya a adelantá di lo ofresé e puesto na su mentor, di kende e mes tabata minister, loke segun krítikonan di gobièrnu ta mustra riba e posibilidat ku e presidente aktual lo bira un espesie di poder den sombra dje presidente nobo ku ta bai sinta.
“Mi ta sigur di mi mes, manera nos a hasi for di e promé dia di su gobièrnu, ku nos lo sigui traha den un bon ekipo”, segun e presidente nobo durante di un seremonia pa presentá su gabinete. Chaves (64) no a duna komentario.
Chaves lo tin e reto pa kordiná ku Kongreso e agènda ambisioso di Fernandez pa reformá estado. Segun opositornan, tur kos ta mustra den un konsentrashon di poder similar na esun dje mandatario salvadoreño Nayib Bukele. Pa esei bira posibel, e gobièrnu mester konta ku mayoria apsoluto, pero ku tampoko ta sufisiente pa kambio Konstitushon.
Fernandez i Chaves a tira falta riba podernan públiko pa e kresiente violensia di narkotráfiko, ku a trese kuné ku Costa Rica a pèrdè su reputashon komo un dje paisnan mas sigur i stabil dje kontinente.
