BERLIN, AP.- E presidente skohe na Catalonia a pidi e presidente di gobièrnu spañó Mariano Rajoy pa papia ku e lidernan separatista katalan. Quim Torra a hasi e yamada miéntras e tabata bishitando su antesesor na Berlin.
E legisladornan katalan a skohe Torra djaluna pa enkabesá e region. E polítiko a primintí di konstruí un repúblika independiente trahando ku su antesesor Carles Puigdemont, kende ta na Alemania apelando su ekstradishon.
Den un konferensia di prensa ku Puigdemont na Berlin, Torra a bisa: “Por fabor señor Rajoy, pone un dia i ora pa start un diálogo sin kondishon, pa nos papia di tur kos”.
E presidente di e gobièrnu, kende ta oponé na independensia katalan, a rospondé ku e ta dispuesto na dialogá “konforme aplikashonnan di lei”, agregando ku “mi ta kere ku ta algu positivo pa realisá un reunion”.
Durante un bishita ofisial na Bulgaria, Rajoy a rechasá e plan di independensia di Catalonia i a bisa ku e otro dos partidonan spañó prinsipal i e sosialista PSOE I Siudadanonan, ta sostené e postura di Partido Popular pa loke ta trata e tema aki. El a agregá ku “no tabatin independensia, ni tabatin un repúblika, i lo no bai tin esaki tampoko”.
