MADRID, SPAÑA (AFP).- E presidente di gobièrnu spañó, Pedro Sanchez, a ekspresá su apoyo na e karta di sekretario general di ONU dirigí na Konseho di Seguridat den kua ta hasi un yamada pa stòp e guera den Gaza pa motibunan humanitario.

“E katastròf humanitario den Gaza ta insoportabel”, segun e sosialista Pedro Sanchez riba X. E presidente spañó, un dje bosnan mas krítiko den Union Europeo pa loke ta aktitut di Israel, a pidi e Konseho di Seguridat pa aktua di inmediato pa imponé un paro di guera humanitario na Gaza.

Den un karta sin presedente dirigí na Konseho di Seguridat, e sekretario general di ONU, Antonio Guterres, a atvertí ku e bombardeonan di parti di ehérsito di Israel ta provokando un “inminente kolapso total di órden públiko” den Gaza. “Meimei dje bombardeonan konstante di parti di forsanan armá israelí i sin refugio, i e mínimo pa sobrebibí, por spera un kolapso total di órden públiko debí na kondishonnan desesperá, ku lo hasi imposibel te hasta un asistensia humanitario limitá”, segun Guterres a skibi.

Ta pa promé biaha for di despues ku el a bai para na kabes di ONU den 2017 ku Guterres ta invoká artíkulo 99 di e Karta, ku ta pèrmiti’é “yama atenshon di e Konseho” riba un asuntu ku “por pone den peliger e mantenshon di pas i seguridat internashonal”.

LAGA UN KOMENTARIO

Please enter your comment!
Please enter your name here