Meskos a sosodé ku Chevron luna pasa, den su intento pa isolá Caracas
Estádos Unídos.-E magnate petrolero Harry Sargeant III ta un donante rekonosé di GOP, pa su esfuersonan tras di kortina pa manehá e situashon hostil entre Merka i Venezuela. Djabièrnè, esta ayera gobièrnu di presidente Donald Trump a ordená e kompania petrolero di Sargeant, Global Oil pa bandoná e pais Sur Amerikano, asina Wall Street Journal ta informá.
E kompania di e bionario merikano Sargeant, porsierto un gran sostenedó i aliado di Donald Trump a haña òrdu pa bandoná Caracas. Global Oil ta e kompania ku a sera akuerdo ku Refineria di Kòrsou, awendia 2Bays pa produsí asfalt i bende esaki ku Merka. Global Oil ta e di dos kompania merikano ku ta haña òrdu pa bandoná Venezuela, despues ku e kompania Chevron a risibí e mesun òrdu luna pasa. Ámbos kompania tin te mei 2027 pa stòp tur operashon na Caracas. EXTRA ta pendiente un reakshon di outoridatnan lokal riba e paritikularidat aki.
E desaroyo aki a sorprendé hopi hende debí ku ta konosí ku Sargeant ta hunga gòlf ku Trump na su residensia Mar-A-Lago. Venezuela ta e pais ku ta poseé algun di e reservanan di petroli i gas natural di mas grandi na mundu.
For di mei 2024 ku el a risibí su lisensianan, Global Oil a karga barkunan grandi ku krudo pisa di Venezuela. Parti di e produkto ta keda usá e.o pa konstrukshon i drecha kayanan na Merka. Entretantu tur tres lisensia di e kompania Global Oil a keda revoká.
