MONTEVIDEO (AFP).- Presidente di Uruguay, Luis Lacalle Pou, a duna di konosé di ta “enormemente preokupá” pa kasonan di asesinato den e pais, dianan despues di un insidente ku kuater asesinato, ku a inkluí un mucha hòmber.
“Loke ku nunka m’a hasi i lo no hasi awor aki tampoko pa loke ta keda di mi gobièrnu, ta bin ku esküs. “Tin un preokupashon enorme pa e asesinatonan. Nunka bosnan a tende e gobièrnu aki bisa ku ta reglamentu di kuenta. “Tin bida ku ta bai pèrdí. I den e kaso aki, ademas, bida di un mucha”, segun e mandatario kende su mandato di sinku aña lo kaba den mart otro aña.
Djaweps siman pasá kuater hende a muri tirá den e bario di Maracaná, kaminda outoridatnan ta sospechá ku tabatin bendementu di droga. E víktimanan tabatin 40, 18, 16 i 11 aña.
E presidente uruguayo a duna di konosé ku polis ta konta ku “elementonan importante” pa resolvé e krímen aki.
E rèkòrt di kantidat di kaso di asesinato den e pais tabata den 2018. Uruguay, ku 3.4 mion habitante, a registrá 382 asesinato den 2023, un tasa di 11.2 morto violento pa kada 100.000 habitante, práktikamente meskos ku den 2022, tempu ku asesinatonan a oumentá ku kasi 26% relashoná ku 2021. Den 2018 e kantidat di asesinato tabata 420.
Uruguay, pais kaminda no ta eksistí re-elekshon presidensial inmediato, lo tin elekshon pa presidente i legislativo den òktober benidero.
