CARACAS.- Ayera nochi retnan di notisia di Venezuela a plama e notisia ku presidente venezolano Nicolás Maduro den un programa ayera a anunsiá di sera frontera ku Kòrsou, Bonaire i Aruba. El a bisa ku e ta sera e vianan aéreo i marítimo pa 72 ora.
El a bisa ku e desishon aki ta pa na defensa di e interesnan ekonómiko di Venezuela, i a pidi gobièrnunan di e islanan aki pa tuma e medida ku el a eksigí durante di e último tres añanan.
E presidente e bai mas leu di deklará ku: ‘mi no ke a tuma e medida aki, pero mi ta dispuesto inkluso pa tuma un medida mas radikal’.
El a hasi yamada pa aselerá e trabounan pa establesé un komersio sano ku Aruba, Bonaire i nos di Kòrsou.
Di otro banda el a ofresé tur garantia di transporte di venezolanonan ku ta di bishita komo turista na e islanan ABC i di otro banda e siudadanonan di e tres islanan ku aktualmente ta enkontrá den teritorio venezolano.
No ta promé biaha ku presidente Nicolás Maduro ta lansa e gritu aki di sera frontera ku Venezuela. luna pasá tambe el a hasi tal deklarashon. I na momentu ku promé minister a tuma kontakto ku kònsùl venezolano pa aklarashon riba e deklarashonnan, e diplomátiko a bisa ku e no a haña nada ofisial.
