…Un eks-prezu palestino ku ayera a rekobrá su libertat den e interkambio ku Israel, ta selebrá su libertat huntu ku famianan…
JERUZALEM (AFP).- Nael Barghouti, e prezu palestino ku a pasa mas tantu tempu den un prizòn na Israel, a keda liberá ayera den e interkambio di shete grupo di rehen pa prezunan, den kuadro dje periodo di trankilidat entre Israel i Hamas den e área di Gaza.
Barghouti a pasa 45 aña tras di trali, 34 di nan di forma konsekutivo. El a yega Egipto djaweps, despues di a keda ekspulsá for di teritorionan palestino una bes ku el a haña su libertat.
Barghouti a keda detené pa promé biaha den 1978 i kondená na kadena perpetuo pa asesinato di un ofisial israelí den atakenan kontra di sitionan israelí.
E tempu ei Barghouti tabata miembro di Fatah ku ta e movementu dje aktual presidente palestino Mahmud Abas, ku sede na Ramala, den Cisjordania, i rival dje movementu islamita Hamás, ku for di 2007 ta goberná Gaza.
E atministrashon di prezu israelí ayera a konfirmá ku 643 detenido palestino a keda liberá for di vários prizòn dje pais segun términonan dje akuerdo di periodo di pas, despues ku Hamás a entregá kadaver di kuater rehen sekuestrá den e atake dje movementu islamita riba 7 di òktober di 2023 na Israel.
